:
«Ժառանգություն» կուսակցության պատգամավորներ Ստեփան Սաֆարյանն ու Արմեն
Մարտիրոսյանը Տավուշի մարզի մի շարք գյուղերի` վրացական պետհամարանիշերով
մեքենաների վարորդների հետ միասին այսօր առավոտյան շարժվել են դեպի
Նոյեմբերյան:
Այստեղ նրանց են միացել տեղի վարորդները եւ անցկացվել է կարճատեւ հանրահավաք:
Ապա բողոքի ակցիայի մասնակից շուրջ 50 մեքենաների շարասյունը ուղեւորվել
է դեպի Բագրատաշեն: Հընթացս նրանց միացել են նաեւ Նոյեմբերյան-Բագրատաշեն
ճանապարհի վրայի մի քանի գյուղերի վարորդներ եւ ի վերջո շուրջ 80 մեքենա
հասել է Բագրատաշեն:
Ըստ «Ժառանգության» մամլո հաղորդագրության` այստեղ տեղի է ունեցել եւս
մեկ հանրահավաք, որից հետո պատգամավորները վարորդների անունից հանդիպել են
Բագրատաշենի մաքսակետի պետ Կարեն Գրիգորյանի, ինչպես նաեւ Գուգարքի մաքային
վարչության պետ Հովհաննես Աբովյանի հետ, ում փոխանցել են վարորդների` 4
կետերից բաղկացած պահանջագիրը:
Հովհաննես Աբովյանը տեղեկացրել է, որ օրերս փոխվարչապետ Արմեն
Գեւորգյանի մոտ տեղի է ունեցել խորհրդակցություն, որի ընթացքում քննարկվել է
ավտոմեքենաների ներմուծման մաքսադրույքի հնարավոր նվազեցման խնդիրը,
ինչպես նաեւ նոր օրենքի կիրառումից տուժած վարորդներին անտոկոս վարկեր
տրամադրելու առաջարկներ: Այս հարցերը գործադիրի օրակարգում են եւ
Կառավարության վաղվա նիստում քննարկվելու են:
Պատգամավորները տեղեկացրել են հանրահավաքի մասնակիցներին, որ վաղը,
փետրվարի 17-ին Կառավարության շենքի առջեւ տեղի կունենա Շիրակի, Լոռու եւ
Տավուշի մարզերի վրացական համարանիշերով (չմաքսազերծված) ավտոմեքենաների
վարորդների բողոքի ակցիա:
A1plus.am
| 
