Նոյեմբերյանի կենտրոնը այսօր արտասովոր բազմամարդ էր: Պատճառը նոյեմբերյանցիների մոտ շատ սիրելի տոնն է` Վարդավառը կամ ինչպես նոյեմբերյանցիներն են ասում "Վարդեվորը": Նոյեմբերյանցիները և հարակից գյուղերի բնակիչները չնայած առկա սոցիալ-տնտեսական ծանր պայմաններին, համաշխարհային ֆինանսատնտեսական ճգնաժամի բացասական ազդեցությանը այսօրվանից դուրս են եկել գնումների, որպեսզի հավուր պատշաճի նշեն ամառային այս գեղեցիկ տոնը: Գնումները շուտ սկսելու հիմնական պատճառներից մեկն էլ այն է, որ մեր հայրենակիցները Վարդվեվորը ավանդաբար նշում են բնության գրկում և հիմնականում տոնից մեկ երկու օր առաջ հյուրընկալվում են ամռանը սարերում անասուններ պահող իրենց հարազատներին և բարեկամներին: Նոյեմբերյանի նախկին շրջանի ժողովուրդը, բացառությումբ Ոսկեպար գյուղի, այս գեղեցիկ տոնին իր սեփական բարբառային անունը տալուց բացի ավանդույթի համաձայն իր սեփական օրն է նաև սահմանել այս տոնը նշելու համար: Մենք սովորաբար Վարդեվորը նշում ենք հուլիս ամսվա վերջին կիրակի օրը, որը այս տարի հուլիսի 26-ն է, իսկ քրիստոնեական տոնացույցով Վարդավառը նշվում է ուղիղ մեկ շաբաթ շուտ:
|
